MANJUA TANAH ULAYAT

Lantam sadang duduok di Lapou Kopi “ MALAKO “ samo jo si Ajo, Anduok, Kinca jo Ojok singgo urang dinamokan konsi : “ MALAKO “. Urang tu mampatangkakan “ tabuong anyuik ‘ dek karano hari Jum’at, jadi perei bakarajo. Lapou tu punyo Mamak nan bajaga kopi bahantak tu. Mamak mamulei ota …

Mamak Ajo ! Kasiko lah waang, ado curito lamak ko ‘a !
Ajo Carito apo tu mamak ?
Mamak Kapatang ko si Anduok alah manarimo keeping dari si Kinca.
Ajo Kepieng apo tu Mamak,ajak ‘e ?
Mamak Ladangnyo nan di subarangtu kan alah dijuanyo ka dakek si Kinca ! Untuok mambukak ladang kalapo sawit tadanga di ambo. Tapi cadiek akanyo. Ado disitu robo tingga, di salek-salekkannyo tampang sawit nan di campakkan urang tu, lalu tumbuoh maregek. Datang si Kincah di balinyo.
Ojok Inyo baladang conok-conok di subarang deh !
Mamak Iyo , kacak langan bak langan namonyo tu.
Lantam Apo nan baladang, mak.
Ojok Jadi, itu nan di juanyo ? Mano ado tanahnyo disitu ! Itu kan tanah adat, di pakei nan bulieh,kan Mak ?
Mamak Iyo, bana kato waang tu. Tapi, nan manjua jo nan mambali indak baradat do, atau indak tau di adat do !
Lantam Menuruik pandapek Mamak, baatu ?
Mamak Indak bisa dijua tu do. Itu untuok urang banyak Masyarakat Adat Ranah Nata ko.
Ojok Jadi, baa caromnyo tu, Mamak ?
Mamak Pai kecekkan ka Mamak Suku waang atou Kapalo Suku, mak inyo nan ma urusnyo ka dakek Datuok.
Lantam Itu nan rancak deh Mak.
Mamak Tanah tu kan untuk kito basamo. Bukan untuk pasaurangan,parusahaan atou pangusaho jo panguaso. Datuok ajo dak bulieh manjuanyo do. Mak tau waang, tanah tu milik Allah nan indak bulieh di paju balikan do.
Lantam Jadi, mak ! Kok barasil baa tu ?
Mamak Aaa… itu. Ado aturannya nan disabuik “ BUNGO “. Kasawah babungo ampieng, kaladang babungo padi, karimbo babungo kayu,katanah babungo tambang.
Anduok Apo makasuiknyo tu Mamak ?
Mamak Ma agie “ zakat “
Anduok Kamano kan di agiekan ?
Mamak Ka musajiklah. Kan itu nan untuok urang banyak. Wakatu dolu, urang nan basawah dari Jambuoh Rao ka Sawah Laweh,Sawah Lambah,Cilacap,Banjaragam,Banja Aceh, kok alah sudah tuei urangtu ma antakan “ bungo alias zakat “ ka Musajik Palak Taleh, dek karano ulayat Palak Taleh.
Ojok Paten juo tu deh. Kok di Jambuoh Aceh, bak mano pulo tu Mak ?
Mamak Bak itu juo. Urang nan basawah di Sawah Niru,Kampuong Baru, Pasie Ayie ma antakan zakatnyo ka Musajik Kampuong atou Musajik Tambak.
Lantam Kini ko mak, urang banyak ma agie bungo ka dapuo jo ka beng.
Mamak Beng apo pulo tu ? Apo beng tu, Lantam ?
Ojok Beng tu mak tampek urang barutang. Karedit namonyo.
Mamak Antahlah puloooo…..
Beko to sambuong curito yo. Wakatu alah tibo, Mamak nandak sholat lei.
( lalu urang tu bubar dan pai sorang-sorang,sadangkan mamak pai ka surou ).