MALAGAK

M A L A G A K

MASO LAPEH TARAGAK

Oleh : Shaff Ra Alisyahbana Dt Malako

MALAGAK  dalam baso Mesir ( Melayu Pesisir ) Ranah Nata adolah 

baparago balabiehan nan indak sajageknyo yaitu dalam usaho 

ma ajan tuah nan takadang sasudah itu tadangek.

Nan panulis makasuik dalam tulisan ko adolah Maso Lapeh Taragak

yaitu wakatu nan tapek malapehkan rindu taragak

dek karano basuo dan bakumpuo ka sado alae yaitu ;

1. Sanak (Satu Paranakkan) yaitu Sudaro kanduong,

Basanak Ayah jo Umak  Sumando Manyumando

Anak Kamanakan jo Ipa Bisan dan Sapaambiekkan.

2. Dosanak ( Sumando Satu Paranakan)

  yaitu Basanak Angku/Uci Sumando Manyumando.

3. Badosanak ( Banyak Sumando Satu Paranakan ) 

          yaitu Basanak Nenek Sumando Manyumando

4. Konco Palangkin jo Sapacokian

5. Sakampuong Ilaman

6. Sa Arah Sa Tujuan Sa Jamaah

Nan biasonuyo Maso Lapeh Taragak ko adolah

Aghi Ghayo Idul Fithri atao Syawalan dan biasp juo 

disabuik Lebaran yaitu Lebih Banyak Randuk.

Tapi ado juo Sanak,Dosanak atou Badosanak kito nan

bana-bana pulang kampuong sambie Malagak, 

mak dikatokan inyo urang nan barasil diparantouan.

Iyo rental motor salamo duo tigo hari,

lalu balagak bantuok nan inyo punyo motor rental tu,

padahal nan disalang dalam baso kerennyo rental.

Caro Malagak sanak kito nan iko kurang juo eloknyo

dan kalou indak barasil di parantoan tu, labieh elok pulang sajo.

Dalam tulisan ko ado saketek nan agak bisa ambo curitokan dimana

salah sorang dari konco palangkin ambo nan samo main bola

dilaman rumah uci si Maza Yudha ( Marah Zainuddin) 

nan banamo Intan Podi di Tambak nan kini inyo alah barasil

manjadi urang katigo di Propinsi Sumut, 

dimano kalou inyo pulang  alun panah kami basuo lei,

karano barek mandatangi urang nan alah tenggi ko 

dan inyopun dak panah turun tanah atou manjajak tanah do,

raun-raun kapasa atou minum kopi dilapou atou lainnyo.

Kabanyakan nan pulang ba aghi ghayo tu juo malapehkan

taragak jo malagak dan ado juo basibagak nan karano

inyo alah pai ka lua nagari dilingkuongan urang bagak-bagak.

Untuok  Malagak ( Maso Lape Taragak ) ko ado nan salieng

kunjuong bakunjuong dan ado pulo nan mamelok acara 

Halal bilhalal dan Reuni (Resepsi Untuk Harmoni)

kawan jo konco, sobat sa sikolah guno salieng maaf mamaafkan.

Alangkah eloknyo bilo Malagak tu di acara Reuni diadokan

di sikolah dimano inyo nan di sabuik alumni tu, 

mak lapeh pulo taragak sikolah tu dan bak itu juo

jo guru dan tata usahanyo dan nan labieh 

rancak bana adolah baragie saketek ka sikolah

tu sabagei kenang-kenangan pangalaman dari

rantou dan palieng tidak ma agie saran jo pandapek

mak supayo bakas tampek kito sikolah 

tu ado marubah dan barubah bantuok sikolah nan alah maju.

Kalou kito pulang kampuong, dak usah Malagak

tu nan iyo untuk malagak urang kampuong awak, tapi Malagak untuok Maso Lapeh Taragak.

Salam dari tapian/pincuran tampek mandi

IMBOAN

IMBOUAN

oleh : Shaff Ra Alisyahbana Dt Malako

Alumni Madrasah Raudlatul Ilmiyah Tahun 1967

Assalamu ‘alaikum w.w.

Sanak, Dosanak dan Badosanak kasadonyo, baiek nan barado di kampuong ilaman maupun barado di parantouan.

Ambo Syahriyal Fahmy Batubara alias Shaff Ra Alisyahbana alah mandapek undangan dari Madrasah Tsanawiyah Muhammadiyah 20 Nata, dimano pado tgl.04 September 2011, kito nan ka mahadiri acara Reuni atou Halal bilhalal Alumni Madrasah Raudlatul Ilmiyah ( MADRI ) Natal batampek di MTs Muhammadiyah 20 Nata nan dimulei jam 09.00 wib.

Sesuei jo isi pasan nan  disampeikan yaitu supayo disampeikan kadakek sadonyo mantan/alumni dari tahun 1965, mako sabagei panyambuong lidah ambo mohonkan kasadonyo saluruoh konco facebooker suayo dapek hadir pado jadwal tasabuik diateh dan kadakek kawan-kawan nan mangatahui namo-namo  tu dibawah ko nan  mungkin alah bastatus Ayah/Ibu/Mamak/Mintuo atou apopun panggilannyo untuok manyampeikan hal ko untuok kumpuo basamo :

 “ MALAPEHKAN TARAGAK BASUO JO KAWAN

SAKONCO SAPACOKIAN NAN SAMO BASIKOLAH DI MADARASAH RAUDLATUL ILMIYAH KOTA NATA “.

Saingek pangana ambo wakatu maenjadi murik di Madarasah Raudhatul Ilmiyah Tapi Bukik, kawan kakak klas dan saklas ambo adalah :

Isnaniyah, Yusrawati (Pik Buya), Suryati,Dafran, Darwati, Masniar, Ramli,Yusran,Ratna Dewita Sitompul,Ratna Sari, Chairani Asmina,Muhammad Amin, Ahmad Fauzi Lubis, Misdar, Rosita,Safniar,Husnidah, Yusnidah,Rifwan,Lahuddin,Aslamiyah,

Siti Saleha Nasution,Afdansyah,Nasruddin,Maskuddin,

Ibrahim Raksa,Omran,Asmiannur,Subdatunnur,

Sari Pamina,  Zainal Halim, Juariyah, Roswita,

Ulfah Bandar,Nayda Ariani (Butet),Tisnawati,

 Masdewita, Sarwansyah,Kasman, Husnidar

dan lain-lainnyo nan indak dapek takana lai.

Tapi mungkin kawan lainnyo maingek kawan

samo sikolah di Madri tu.

Sadangkan mantan murik Madarasah Budi Bahagia

diarokkan sabagai panggambira sakaligus

Panasehat Ikatan Alumni ka kito didirikan ko.

Barikuik ambo sampeikan salinan sabuah puisi nan bajudul :

MADRASAH RAUDHATUL ILMIYAH

( AL- MARIYAH ) KOTA NATAL

Karya ke – 50 dari Sry Fahmy Batubara

nan pado wakatu itu manjabat Tata Usaha.

(dibaso Melayu Pesisirkan)

M ..mari kito arahkan pandangan

A ..arah kasubalah Pantei  Barat Lauik  Indonesia

D ..dalam ulayat Kabupaten Tapanuli Salatan

R ..raudhatul ‘Ilmiyah badiri gagah

A..asuoh Paja-paja sajak zaman Panjajah Tempo Doeloe

S ..si Panaruko  Buya H.Hasan Basri Abd.Hamid An-Natai

A..ajang pandiri  Djamijatoel Chaerijah dan Soeboeloel Chaer

H..hinggo kinin dibawah Panasehat H.A.Yusuf Hasan.

     (dirubah manjadi hinggo kini jadi Tsanawiyah Muhammadiyah

R..riwayatnyo panuoh darito dan katabahan

A..antaro gajolak kafahaman Khilafiyah

U..ujudlah Madrasah warisan Budi Bahagia

D..dengan program Pendidikan dan Pengajaran Modern

H..himbouan kawujudan Islam nan sabana-banarnyo

A..al-Qur”an jo  As-Sunnah aleh dasarnyo

T..tarui mambina basamo kasabaran dan hati tabah

U..untuok mancapei pribadi Muslim Pancasilais

L..lahienyo manusia pambangunan nan sautuohnyo.

I..itulah dia Madrasah Raudhatul Ilmiyah Kota Nata

L..limbago  Pandidikan Agamo nan  tatuo

M..manyalusui  zaman  Panjajahan dolu kalo

I..ibarat sorang Buya alah bakaki tigo

Y..yang pake tungkek dan bakaco mato

A..aktip mandidiek dan indak takana litak

H..hinggo sang surya mungkin tabit di ufuok Barat.

N..nun, dijalan Muhammad Nata pasav tigo

A..anda batamu jo Madarasah Raudhatul Ilmiyah

T..tampek jemaah pimpinannyo di Musajik Gadang Al- Huda

A..anjuran dan pangayoman Majelis Dikdasmen PCM Nata

L..luangkan wakatumu untuok Anjangsana Muhibbah kasiko.

                                                                    Hari  Asyura 1404 H.

Dipetik dari Majalah Pembina No.47   Tahun  1978.

SINDUANG PALAK TALEH

SINDUANG PALAK TALEH
 PERMATA YANG HILANG DI RANAH NATA







oleh : Shaff Ra  Alisyahbana Dt Malako

Pado jama daolunyo,satiok bulan puaso salalu diadokan malam hiburan jo Main Sinduang dan Simuntu Dayak. Acara ko biaso dilakukan dek pemuda dan remaja di Ranah Nata sainggo manjadi Permainan Remaja Nata ( PERMATA ).

Permata Sinduang jo Simuntu Dayak marupokan pamainan profil nan ado di Ranah Nata nan di perankan dek Tuan (laki-laki) jo Noni (padusi) dari babagei corak dan etnis suku nan ado di Ranah Nata.

 
Ado nan manjadi Polisi, Tantara, Dokter, Hansip, Palang Merah, Bidan, Saudagar, Petani, Nelayan, Pagawei, Polantas, Anakdaro dan Marapuley bapasang-pasangan. Dari kalompok Simuntu Dayak, ado urang Dayak, Kubu/ Lubu dan lain sabageinyo.

Pamainan utamo adolah Sinduang nan di pelok dari karangko batang buluoh nan dipelok lingkaran dan dirangko jo rotan, kamudian dibagian lua dibaluik jo ijuok anuo sabagei bulu Sinduang. Sadang kan bagian kapalo dipelok dari karate karbon tik atou palastik hitam nan bantuoknyo mirip kapalo sa ikuo sinduang, batalingo,bamato dari kara taluo ayam, balidah nan bisa digarik-garikkan dek batali sampei ka dalam nan ditariek dek nan mamainkan sinduang dari dalam lingakaran karangko, sadang kan tangan sinduang di bagian dalam adolah tampek mandagang sinduang dan mamainkannyo.

Adopun Tuan jo Noni tadiri dari laki-laki kasadonyo dimano satiok pamain indak dapek dikatahui sia urangnyo nan manjadi anakdaro dan bak itu juo simuntu dayaknyo. Polantas mangatur lalu lintas pamainan nan manguliliengi sinduang sambie manari-nari sasuei jo rantak gandang sinduang,sadang kan nan manyalo-nyaloi pamaian adolah dewa nan bakapak manyonsong Tuan jo Noni. Akie pamainan adolah main simuntu dayak nan irama tokok gandangnya agak capek ba irama disko raggae.

Sasudah salasei tarawei, turunlah konsi sinduang mangunjuongi tiok rumah nan patamo mintak tabik sabagei penghormatan kadakek tuan rumah nan ma imbou main, kamudian tuan rumah mambayie sakadar paragie nan indak ditantukan bayierannyo. Parmainan salasei sampei tangah malam.

Khusus pamainan Sinduang Palak Taleh dan daerah mudiek lainnyo, sasudah main Simuntu Dayak di adokan patunjuokkab pamainan khusus yaitu kesenian Ranah Nata saumpamo Basandieng Duo jo lagu Simambang,dimano Tuan jo Noni nan manjadi Anakdaro jo Marapuley dipasandiengkan dengan bayieran khusus nan ditatapkan dek konsi bayierannyo sakali main.

 
Tuan rumah mangajukan pamintaan tari atou lagu nan disukoi saumpamo tari bungkuy, salendang, payuong, barampek ,kuala deli, sarampang duo baleh atou tari samba paninggalan si Patokah (Portugis).
Hasil dari pamainan ko di lungguok dek bendahara dan manjalang ka ari rayo sasudah dikalukan sagalo biaya nan dikaluakan, barulah dibagi sasuei jo jabatannya untuk pambali pakaian ba ari rayo nantinyo.

Dimaso remaja penulis panah bagabuong jo konsi GASAK ( Gerakan Assalamu’alaikum) di Kapalo Pasa (Setia Karya kinin) dan sato manjadi Noni. Alhamdulillah, 

lape baju ari rayo di taun tu.
Alangkah baieknyo pamainan ko di hiduikkan kumbali, sabab palambang pasatuan sagalo suku nan ado di Ranah Nata kito nan tacinto ko.
Main Sinduang adolah PERMATA yang hilang di RANAH NATA nan paralu kito lestarikan seni budayanyo baliek. Semoga.

 
Bilokah PESTARANA kumbali diadokan di RANAH NATA ....???

SHILATURRAHMI

M A N J A L A N G
MANiti JAnjang & LANGgam
Oleh : Shaff Ra Alisyahbana Dt Malako

Alah manjadi adat kabiasoan di Ranah Nata (Natal) satiok Aghi Ghayo (Syawwal) pai mandatangi nan gaek-gaek jo nan sapangkek untuok basilaturrahmi. Karajo ba silaturrahmi ko di Ranah Nata disabuik MANJALANG nan marupokan karajo 

MANiti JAnjang & LANGgam.

Baiek SANAK (Satu Paranakan), DOSANAK (Sumando Satu Paranakan) dan BADOSANAK (Banyak Sumando Satu Paranakan) dikunjuongi basamo-samo. Kalou maniti janjang tu langgam ka Sanak yaitu Angku/Uci,Ayah/Umak,Sanak Ayah/Umak,Mande,Moncu, Paman dan Sudaro kanduong, di baokkan sa angkek-angkek juadah tradisional saumpamo kue sapik,lamang,kue kanari,kue bolu, alu pade,sangkoya,katupek sipuluik,cetakan,wajik,tapei, ripik, juada mayang, kabek kayu, cucuo pandan dan lainnyo.

Jikok nan didatangi tu maniti janjang di langgam Dosanak saumpamo Basanak Ayah/Umak, Mintuo, Ipabisan,Pambayan, juo dibaok juadah tapi indak sabanyak di janjang/langgam Sanak. Sadangkankan maniti janjang di langgam Badosanak hanyolah datang manjalang sajo. Jadi, janjang jo langgam Sumando sasuei jo artinyo yaitu Sudaro Manjadi Dosanak, di kunjuongi kasadonyo.

Dek dilacuik kaadaan kisruoh atau krisis manyaluruoh, langgam jo janjang titian silaturrahmi ko alah barubah sifatnya dari BARAGIEH manjadi MAMINTAK. Manga indak !
Cubolah Sanak,Dosanak dan Badosanak caliek dijaman Reformasi jo Globalisasi ko, alah mambulek i kasadoalae. Manjalang Anakdaro jo Marapulei ajo kini ko ampieng indak mamakei cabang lei do. Kalou nan biasonyo taradok ka janjang Sanak jo Datuok, langgamnyo adolah Baragieh Jamba Nasikunik Panggang Ayam agak sabalah ayamnyo,nan dibaleh jo paragieh dari nan di kunjuongi barupo sahalei bakal baju atou kain, tapi kini alah mulei baransuoh abih.

Pai manjalangpun kadang indak barombongan lai,tapi cukuik ba kaduo urang sajo alah latu.
Bak itu dalam maniti janjang jo langgam Manjalang Aghi Ghayo yaitu indak Baragieh lai (mambaok kue),tapi cukuik mambaok anak bini jo TAS KETEK sabagei tampek nan di MINTAK. Sado anak-anak dibalikan Tas Ketek untuok manangguok kepieng dari Sanak,Dosanak jo Badosanak nan kini labieh tanamo dalam istilah yaitu SALAM TEMPEL.

Di Ranah Nata kini alah dibudayokan suatu karajo nan dibanci dek Nabi Muhammad SAW yaitu acara mamintak-mintak dimano paja-paja jaman kini ko naiek rumah turun sarumah mambaok dompek sandang atau tas ketek mamintak salam tempel, dimano raso malu mamintak-mintak tu di tanamkan ka dakek anak-anak nan takadang salieng indak tau pasaluokkannyo ka dakek nan di datangi. Tapi itulah rono ranah pado jaman reformasi jo globalisasi dimano mambudayokan indak bamalu lai kadakek anak-anak/paja-paja sabagei banieh pamimpin jaman nan ka datang ko nan ba arti masyarakat Ranah Nata ko alah kurang baradat istiadat nan mailangkan raso malu. Bilokah maso baragieh , sabab dari ketek alah mamintak-mintak ...???
Akienyo, bacolah sabuah pasan atou tautan di facebook Al-Hadist dalam posting Bausaho nan ba buni La an ya’khudzu ahadukum hablahu faya’tiy bihazmati hathabi ‘ala zhahrihi fayabi’uhaa faya kuffallahu bihaa wajhahu khairun min an yas alan naasa ‘athauhu aw mana’uhu.
Artinyo : Sungguoh sorang nan mambaok tali,kamudian mambaok sakabek kayu di rogaknyo lalu di juanyo, mako dek itu Allah manjago dirinyo, adolah labieh rancak dari pado mamintak-mintak kadakek urang lain, baiek urang tu ma agieh atou manulaknyo. (HR Bukhari dan Muslim).

LIMOU ARUN

LIMOU ARUN
Oleh : Shaff Ra Alisyahbana Dt Malako

Alah manjadi adat kabiasoan (bukat adat) di Ranah Nata, bilo sari lai nan ka masuok bulan puaso Ramadhan, nan mudo-mudo ma ambiek kasampatan pai ba LIMOU ARUN ka tampek nan bisa manimbuokan maksiat saumpamo ka carocei (ayie tajun),tapian kosiek ,batu ruso (pasie pantei barat) dan pasie ayie (pinggie sungei nan dangka).

Limou Arun manuruik adat hanyolah sabuah acara dalam maso batunangan dimano pihak padusi ma agie LIMOU ARUN, sadangkan pihak laki-laki ma ANTA DAGIENG.

LIMOU ARUN adolah ramuan keramas sacaro tradisional nan tabuek dari rabuisan asam limou puruik ,asam limou katuri nan dicampuo jo daun kabelu,pandan musang,daun dilam dan urek ruso. Untuok umum limounyo adolah asam limou katuri, sadangkan untuok calon marapulei adolah asam limou puruik.

Salamat balimou arun bagi sadonyo sanak kito nan sadang batunangan.

Sabanyo, nan disuruoh dek Ugamo bukan balimou tapi mambarasiekan diri baiek lahie maupun bathin untuok mamasuki bulan suci Ramadhan untuok malaksanakan ibadah PUASO RAMADHAN. Tapi sangat kito sayangkan sakali suatu acara nan diado-adokan dek grup PAGHUNTUOH UGAMO nan mambiasokan BA LIMOU LIMOU BASAMO, tautamo nan mudo-mudo jo anak mudo dan paja-paja. Manga bak itu Sanak,Dosanak dan Badosanak ... ???? Iko jawabnyo ...

Dek urang nan bamotor atou bakapa tu indak bakepieng lai,inyo cari kasampatan kadakek nan mudo-mudo,anak mudo jo paja-paja ma ajak pai balimou-limou katampek nan lasap ba buek doso, dek karano inyo nan ka indak sato puaso do. Jadi, untuok manambah doso, tapaso dimulie jo mambuek doso dalam rangka progran Paghunyuoh Ugamo tu.

Dek urang nan bamotor jo bakapatu urang kayo kredit, disikolah saatnyo manunjuokkan maso inyo urang kayo. Inyo ajak masyarakat pai balimou-limou dek karano motor jo kapa nyo ado dan cukuik ma agie bali miak sajo. Kepieng ikolah di bulan puasoko sabagei dana MALENGAH PUASO UNTUOK BAJUDI NAN DI ISTILAHKAN URANGTU BATADARUI, MAMBALI KATUPEK NASI, KATUPEK SIPULUIK.ONDE-ONDE JO TAPEI DAN ROKOK.

Sacaro batarui tarang panulis mangatokan, adokah urang kalauik jo sopir motor nan bapuaso di bulan Ramadhan ..??? Indak ado do. Ikolah nan banyak nanti di narako karano indak sumbayang jo puaso. Dikecekkan indak Islam. Berangnyo. Tibo ado nan ka dipelok acara Mauluik Nabi, Israk Mikraj atou Halal bihalal, urangko banyak baragie,asalkan jangan disuruoh puaso jo shalat.

Jadi, ikolah nan dikecekkan “ MANGANSOI ASOK “ yaitu mangutamokan nan sunat (baragie) dari pado nan wajib (puaso,shalat,zakat dll.)

Di RANAH NATA kito nan tacinto ko, masyarakatnyo nan tabanyak adolah kalompok MANGANSOI ASOK jo PAGHUNTUO UGAMO. Apokah indak ado lai peranan LIMBAGO ADAT, DATUOK, MUI, ALIM ULAMA,CADIEK PANDEI, IKAPERTA DAN PAMARENTAH...???

Babarapo tahun nan lalu ado kagiatan dari IKAPERTA JO LBRN RANAH NATA dalam masalah ko, tapi ditantang dek nan duo kalompok diateh tu. Mari baliek kito lakukan panggarebekkan tahadok urang-urang nan manjua makanan disiang hari untuok URANG KAFIR,LAPOU JUDI dan lain-lain nan marusak RANAH NATA nan bapanduduok 100% ISLAM. Indak pado tampeknyo kito maharagoi urang-urang KAFIR jo ma adokan LAPOU JUDI JO MAKANAN PALENGAH PUASO TARADOK URANG- URANG NAN INDAK BAPUASO.

Bagi muballigh pancaramah, janganlah mambukak masalah sia urang nan indak bakunut,sia nan mamakei musabah,sia nan batarawei 11 jo 23 dan lain sabageinyo, tapi sadarkanlah urang-urang nan duo kalompok di ateh tu, supayo Ugamo Islam kito jangan ghuntuoh dan asyik mangansoi asok sajo, sadangkan kawajiban indak dikarajokan. Sadarkan para palauik jo sopir/stoker motor untuok bisa bapuaso jo sumbayang, mak langang nanti narako dari pauninyo.

Bulan puaso adolah bulan basanang-sanang panuoh ibadah, bulan panuoh rahmat, maghfirah dan ifkun minan naar, tapi kito lupo diri nan didukuong jo kaadaan krisis manyaluruoh (KISRUH). Sabaleh bulan kito mancari RAKAT, indak bisa disisiekan untuk balanjo di bulan puaso. Lain pulo dosanak kito patani nan alah manyadiokan padi kadijadikan bareh dan hanyo mancarikan pambali kawan nasi sajo. Tapi ingek dan jangan lupo, biasonyo di bulan puaso,rakat agak barayie saketek untuok mauji urang-urang palauik apokah inyo batarimo kasieh kadakek nan ma agie rakat tu atou durako, mako Allahpun mancilakokan urang tu dek karano itulah pilihan nan rancak dinyo.

Tasarah...,untuok apo Allah manyadiokan Sarugo jo Narako, kalou indak ado nan ka mauninyo nanti. Tapi pilihan nan palieng elok,rancak,baiek adolah SARUGO.

Apo kaba LIMBAGO ADAT JO IKAPERTA.......????????

MALAKO BATU GAJAH

A M A N A T C U M A L A N G ( 6 )
Asal Muasal Nama Ulayat di Ranah Nata
Oleh : Shaff Ra Alisyahbana Dt Malako

MALAKO BATU GAJAH

Linggobayu Rantou Sialang
Lubuok Buayo antaronyo.
Kabupaten baru alah bakambang,
Sajuoklah hati kiro-kiro

Disalin dari tulisan WG Simon Panjaitan ( De Mantri Propagandist b/d.D.v.G ) dalam majalah Pandoe taun 1939 nan basumber dari Nali Marah Sutan ( Kuria Batu Gajah ) tantang banso Lubu di Batu Gajah. Dalam tulisan tu tasabuik curito asal muasal namo ulayat Linggo Bayu, Labuohan Ajuong, Lubuok Buayo, Tapian Batu, Simpang Bajambah, Simpang Talam jo Batu Gajah.
Daolu, wakatu urang Melayu Indopuro datang ka Ranah Nata banamo Malim ( Datuok Imam Basya dan Pangeran Indra Sutan ) jo mamakei Ajuong yaitu biduok pincalang nan sarupo biduok tambangan. Urangtu mambaok sa bingkah tanah,sa ikuo anak buayo nan batino sadang manganduong, sabatang auo duri dan sorang tukang basi jo anak bininyo.
Sasudah babarapo hari urangtu balayie dari Indopuro ka Ayie Bangih manyinggahi Datuok Imam Basya, sampeilah urangtu masuok KUALO TUO ( RANAH NATA ) dan singgah ditampek nan banamo TANJUONG BUNGO. Makonyo dinamokan TANJUONG BUNGO dek karano disitu tumbuoh bungo tanjuong.
Sasudah urangtu baranti disitu, urangtu nanaruihkan pajalanan ka ulu sungei Batang Nata dan sampeilah disabuah tampek, urangtu mangabekkan biduoknyo disitu sambie mancocokkan tanah nan dibaok apoko samo jo tanah nan di dapekti urangtu dan tanyato kurang cocok. Salanjuiknyo urangtu manaruihkan palayieran sakitar 300 meter dari situ, urangtu pun singgah pulo mancocokkan tanah nan sabingkah tu dan tanyato sarupo tanahnyo. Disikolah urangko manaruko pakampuongan, sabab tanahnyo laweh dan data bak palanta tabantang. Tampek mangabekkan Ajuong atou biduok cako dinamokanlah LABUOHAN AJUONG dan tanah nan dijadikan pakampuo ngantu dinamokan PADANG MALAKO nan didakeknyo ado suak jo parik dan itulah kini tampektu banamo SUAK MALAKO jo PARIK MALAKO.
Indak barapo lamo, siaplah sabuah pakampuongan MALAKO di MUDIEK AYIE nan manjadi cikal bakal KERAJAAN RANAH NATA dan ditunjuoklah DATUOK IMAM BASYA manjadi Rajo Partamo dan Pangeran Indra Sutan manjadi Hulubalang atou Dubalang Rajo. Disitulah urangtu baranak pinak mangambangkan katurunan. Disubarang Padang Malako ditanamkanlah sapotong auo duri nan dibaoktu dan itulah SUAK AUO DURI , sadangkan buayo nan sadang buntieng tu nanda malahiekanyo lai.
Pado suatu ari Puti Ratiah jo Puti Ra’ani sadang manyasa kain baju di PARIK MALAKO, lalu anyuiklah babarapo tungkuo jaguong sarato batangnyo nan diayuikkan dek ayie nan agak gadang dari biasonyo. Sasudah urangtua mancuritokan tantang tungkuo jaguong tu kadakek Datuok Imam Basya jo Pangeran Indra Sutan, mako tibolah anggapan urangtu maso ado urang di ulu sungei nan sadang baladang jaguong. Pailah urangtu manyalusuri tapi ayie dan sampeilah kasabuah paladangan nan dihuni dek urang SILADANG. Jadi, dek karano pakampuiongan alah bakambang maju, lalu urangtu mancari tampek nan lain untuok mambuek sabuah kerajaan sabagei pamekaran kerajaan Ranah Nata di Malako.
Sasudah dapek lahan nan tapek dijadikan pusek kerajaan, pindahlah Pangeran Indra Sutan dan mambaok tukang basi jo anak bininyo dan buayo batino nan alah hamil tuotu. Untuok mamelok paralatan basaw ladang, dititiklah babarapo basi manjadi ladieng,sabik,kapak,baiuong dan sakin nan napanyo dipelok disabatang kayu nan akanyo babantuok lingka sabagei tampek manapa. Tampek tu pun dinamokan LINGKA KAYU kamudian baganti jo sabuik tan LINGGABAYU. Di peloklah Pangeran Indra Sutan sabagei Rajo Kerajaan Linggabayu nan dipusekkan pado sabuah simpang nan diresmikan jo nasi kunik panggang ayam nan dijambah, sainggo tamepk tu dinamokan SIMPANG BAJAMBAH.
Dek karano kaca mangaca rimbo tu, basulah sorang nan sadang duduok diateh sabuah batu data sadang batapa. Urangnyo manakuikkan dan lidahnyo hitam nan basonyo ampieng samo jo baso Melayu Pesisir (Mesir) Ranah Nata. Tampek batapa urang tu banamo SIMPANG TALAM dan urang nan batapatu banamo SI HITAM LIDAH nan bagala RAJO DI ANGKOLA nan barasal dari MUARA SIPONGI.

Dek karano gadangnyo batu tampek batapa tu nan ampieng sagadang gajah dinamokanlah kerajaan tu kerajaan BATU GAJAH. Kalou kerajaan LINGGOBAYU ba ulayat dari MUARO SALAYAN sampei ka SIMPANG GAMBIE, mako kerajaan BATU GAJAH ba ulayat dari SIMPANG BAJAMBAH ka SIMPANG TALAM.
Manuruik catatan, Si Hitam Lidah bamakam di pandam PATILUBAN, BADURAMAN,BADURALAM jo NALI MARAH SUTAN bamakam di BATU GAJAH,sadangkan SI PONCAN bamakam di LANSEK. Turunnyo Rajo di Angkola diparentahi dek Gouvernement, sadangkan Ondernementhoold barado di BATU GAJAH, SIKUMBUH jo PATILUBAN. Kuria wakatu itu ado di BATU GAJAH, NATA dan MUARASOMA.
Disampieng itu ado catatan nan dipelok dek TUANKU MUDO RANAH NATA jo MARAH SUTAN BATU GAJAH yaitu :
1. Patuong timbago nan di pelok di MUARO BANGKO, dibali dek kontler Mehlboom saharago f.25.
2. Leco (urang bunian) banyak tadapek di GUNUONG LECO, AYIE BANGIH.
3. Manuruik katarangan H.Abdul Manap di BATU SONDAT KURIA BATAHAN, ado katurunan leco yaitu HASAN DUNIE dengan anaknyo NURPADI jo SI MILUS. Tahun 1939, Hasan Dunie baumuo 50 tahun.

BUHUO SENTAK MATOARI

MATOARI BUHUO SENTAK
oleh : Shaff Ra Alisyahbana Dt Malako

MATOARI BUHUO SENTAK adolah duo kulimat nan acok di sabuik di Ranah Nata dek mampunyoi sifat nan babeda dan salieng mahantam. Matoari sifatnyo nan angek manyinari Ranah Nata jo pancaran cahayonyo nan lantang dan kadang lindok. Buhuo Sentak tantu talatak digalah manang dek karano buhuo sentak dan satu kutiko bisa disentakkan,waluopun cayo Matoari dak sampei mamutui tali, bukan buhuo mati nan bilo disentakkan tambah arek.
Lambang Matoari di pakei dek Muhammadiyah ditambah jo Duo Kulimah Syahadat , sadangkan Buhuo Sentak di pakei dek Nahdlatul Ulama ditambah jo dunie dan bintang limo.
Pado dekade 1970-1980 di Ranah Nata manjadi wacana tabatiek tabarito dek panehnyo Matoari mamanggang tali Buhuo Sentak, sainggo ma akibatkan rataknyo Ukhuwwah Islamiyah di Ranah Nata.
Bayangkan sajo di akie tahun 1970an, sorang panjago lantera musajik Tambak tapaso ba urusan jo Pamarentah dek mahino Muhammadiyah nan keceknyo adolah bodoh dan indak pandei baretong hari bulan. Makonyo daolu ba hari rayo. Salanjuiknyo pado tahun 1985, sorang tokoh Buhuo Sentak tapaso manjalani sidang pangadilan di meja ijou dek karano mangecekkan caramah/ pangajian di musajik Al Huda Nata dikecekkannyo “ manjua ubek “, dimano tokoh Matoari indak sanang hati dan ma adukannyo ka nan bawajib.
Kini ampieng pulo tajadi sarupo nan dolu, sabab ado urang nan ma ungkik-ungkik masalah khilafiah dalam siasat mancari murid baru madrasahnyo mangecekkan “ jangan masuokkan anak apak ka sikolah Muhammadiyah, nanti apak indak ditalakinkan,indak di kandurikan dan lain sabageinyo.
Kalou kito tiliek jo pandang sabananyo nan tajadi di Ranah Nata, hanyo cuma gauongnyo sajo, sabab lari dari kanyataan nan ditageh kan tu.
Manga indak ....Barapo banyak Ulama-ulama karakok nan sato manjadi sirieh mampabincangkan masalah khilafiah,hanyo tau sakadar masalah itu sajo, sadang dalil dan dasar hukumnyo indak tau dan kadang indak panah mangantuik’i timuo do. Kalou kito paratikan, banyak tajadi urang Muhammadiyah pakek, acara kamatiannyo indak dilakukan sasuei jo paham Muhammadiyah dan bak itu juo urang warga Nahdhiyin pakek, ado nan indak basudakah kaji atou batadarui dan kanduri, sabab itu mangaluakan biaya. Ikolah nan dinamokan “ Tibo di mato di piciengkan, tibo di paruik di kampi kan”. Sadangkan inyo hilie mudiek mampabincangkan masalah khilafiah. Sarancaknyo, amalkan paham masieng-masieng tanpa mausiek paham urang dan jalankan kagiatan organisasitu sacarao baiek. Kinin bukan masonyo lai mampabincangkan nan tetek bengek tu, sadangkan anak kamanakannyo indak panah shalat. Sadarkanlah anak kamanakan kito supayo inyo bisa shalat dan baitu juo anak bininyo. Manga urang dipatureh, tapi inyo sandiri baleak peak dan cumpang purenang. Apokah kito lupo nan difirmankan Allah dalam Al-Qur’an nan babuni “ Qu anfusakum wa Ahlikum Naara “ dan surat As-Shaff ayat tigo nan babuni “ Kabura maqtan ‘indallaha antaquluu malaa taf’alun “.
Mari kito jago diri kito dan kaluarga kito dari api Narako dek karano gadang dosonyo bilo kito mangecek tapi indak kito pabuek. Kito mambincang urang indak bajilbab,indak puaso dan sabageinyo, tapi anak bini,mintuo dan kaluarga kito indak bajilbab,bapuaso dan sabageinyo.
Maso kini nampaknyo, paham Matoari tu alah ditompang dek urang Buhuo Sentak kalou manyangkuik ka dana. Baru sajo tajadi sorang kaluarga nan indak panah sato dalam kagiatan Muhammadiyah dan indak panah sato dalam acara ta’ziah, tapi ado keluarganyo nan maningga dipeloknyo acara ta’ziah dan dikarajokan dek warga Muhammadiyah. Apokah iko suatu kamajuan bagi Muhammadiyah atou hanyo “ Matoari dibaluik Buhuo Sentak “..???
Memang iko adolah salah satu kamajuan Da’wah Islamiyah Amarma’ruf Nahimunkar (DIAN) nan dicatuihkan dek Muhammadiyah,sabab Muhamma diyah tu untuk kasadonyo dan bukan untuok warga Muhammadiyah sajo.
Agak aneh juo saketek, kaluarga nan indak panah manyatoi kagiatan Muhammadiyah bisa di rumahnyo adi acara ta’ziah, samantaro ado kaluarga sorang Pimpinan Cabang nan maningga, tapi bukan warga Muhammadiyah indak di janguok, apolei acara bata’ziah, sainggo manjadikan Muhammadiyah tu aneh bin ajaib. Jangankan ta’ziah, manjanguok sajo pun indak datang. Mau di baok kamano Muhammadiyah koooo... ???
Nashrun minallahi wa fathun qarib. Wassalam.