NATA TABUYUNG SINGKUANG - NATA UTARA
Oleh : Shaff Ra Alisyahbana
Kalou pai ka Buburan
Manampuoh pasie karang jadi
Bia kasie ba jauohan
Maso disiko kasieh badiri
Ikan banamo solu-solu
Dija;lo anak Taluok Balei
Alah lamo kami sudah tau
Mangapo kasieh tabangkalei
Gadang ombaknyo Taluok Balei
Karam biduok susuok batino
Dunieko indak lamo di pakei
Narako isuok kan manarimo
Karimbo ka Taluok Balei
Baokkan aka kalimpanang
Kok jadi topan jo badei
Lauik dimano nan ka tanang
Urek manjelo dalam lauik
Putieh kunieng babaju sirah
Itu manyansei timuo lauik
Gadang ayie jambaktan Karan
Kajei gadang di dakek nipah
Sadang kasieh kini kararan
Sampei sayang talakek sudah
Balayie biduok dari Nareh
Balabuoh tantang Muaro Karan
Kasieh sayang umpamo tareh
Tumbuoh kambang saiyo jalan
Panggautan kampuong nan langang
Parik ba paga pandan abu
Lauik intan ba paga karang
Dimano pelang nan ka lalu
Pasie curam pincuran Taluok
Jangan takanei karano murah
Bagei mamaram cubadak tipuok
Pulou Unggeh Karambie Tenggi
Tampak mantari di tapi lauik
Palak maleleh kaki lah tingki
Karano diri basakik iduik
Banyak tangguok di Bintue
Masak bubuo di Buburan
Indak ta angguok bakalambue
Nandak basuo jo palangkahan
Pasa Buburan tanam karambie
Banyak urang batanak miak
Dek palangkahan mangkonyo bulie
Kandak urang ba tulak indak
Kawalan rimbo Sikaduduok
Mangko lalei tolan di siko
Takilek ikan dalam lubuok
Taluok Balei Sunduiktan Tigo
Siso tumbilang dek panggali
Mangko tolan lamo disiko
Maliek kambang mulo jadi
Pasa Kunkun batembok sabuok
Sabuok batembok karang jawi
Ari paneh ta angkek kabuok
Tampak gunuong marawang hati
Taluok Bayuo di Pondok Rambe
Lalu balayie ka Pulou Tangah
Tadayuok hati ka nan langke
Ramuok bapikie jo pangana
Di Barat Pulou Ringawan
Pagi ari duduok bamanuong
Hiduik mularat dari kawan
Urang Manuncang pai ka Kunkun
Caliek sabanta ka Panunggulan
Badan bakuncang dalam kalumun
Ambiek banta jadi tumpuan
Singkuang muaro Tabuyuong
Siondop duo kualonyo
Tabuang badan karano untuong
Dangakan sajo baritonyo
Singkuang pasienyo lumek
Pasie bacampuo karang lokan
Bagei Nabi sayang ka ummek
Bak itu kasieh pado tolan
Tampak nan dari Salebaru
Adiek sapantun balieng-balieng
Hati bimbang kami lah tahu
Rang Salebaru ka Batumundam
Manompang tiduo di Sikapeh
Badan talaru ba hati dandam
Layong basapuoh cando ameh
Dari Hutaimbaru ka Ranto Panjang
Singgah bamalam di Lubuokkapunduong
Indak tantu di rantou urang
Eloklah pulang manyusuok kampuong
Pulou Iliek di ambang pintu
Aluan biduok ka Siboga
Maliriek subaliek pintu
Maliek lauok dalam bangka
Dibaliek Pulou Lipek Kain
Sauoh saka pandarek putui
Aluan batuka na nan lain
Balayie biduok ka Singkuang
Balabuoh tantang Pulou Iliek
Ibo di dagang nan ta buang
Kok untuong isuok mambari baiek
Singkuang rami di ulu
Sikudidi makan di pantei
Induok samang saba dak olu
Malakik utang alun lansei
Tidak ada komentar:
Posting Komentar