MALAKAMO

M A L A K A M O
Maniti Langkah Karano Moderen
oleh : Shaff Ra Alisyahbana Dt Malako
Malakamo adolah baso Mesir dan kalou di baso Nasionalkan bararti andekato atou sakironyo. Tapi nan dimakasuik dalam tulisan ko adolah “ Maniti Langkah Karano Moderen “, tapi waloupun bak itu kito cubo juo,sakironyo.Dek karano nandak mode ren dan mak jangan di kecekkan kuno atou kolot, mako ditam puoh jalan maniti lang kah “ malakamo “ tu. Antah dek kito nan ka manjadi Kabupaten Pantei Barat dikecek kan keren, banyak manampuoh jalan malakamo tu dikecekkan keren, banyak manampuoh jalan malakamo tu. Manga indak ???

Calieklah jaman kini ko alah tabaliek ujan ka langik dek karano alah banyak patambahan dan parubahan nan indak paralu di rubah dek karano indak sasuei jo Adat Istiadat Ranah Nata kito ko antaro lain yaitu ;

1.NAMO , didalam ra nah facebook kini alah banyak nan maniru-niru namo urang Barat mak supayo keren. Pacuma sajo nanggaeknyo mamelok namo nan rancak dan ba fatihahkan jo aqiqah ma imbou malin,manurunkan jo ma agie namo sarato mamelok Jamba Mintak Namo di Tughun Kaghayie tu. Alah jaleh lain tatulis lain bacoannyo, itu pulo nan ditiru. Itulah Maniti Langkah Karano Moderen (Malakamo).

2.KAKUBE .banyak diantaro kito ko marubah kakube jo jalan maniti langkah karano moderen nan talabieh-labieh Anak Mudo Ranah Nata. Caliek maso kiniko, banyak padu si nan mamakei pakaian laki-laki saumpamo ba sarewa sampik levis, babaju kaus sam pik sainggo bantuok badan tu ampieng sarupo batilanjang sajo. Rambuik nan panjang dipotong pendek bantuok pangke laki-laki. Nan laki-laki bak itu juo,alah mamakei subang,anteing-antieng, dukuo jo galang bantuok padusi. Sarewa nan elok jaitan nyo, kini ko di cabiek-cabiek dan ado pulo bat um bok-tumbok.

3.JAMBA ANYUIK , kini alah ado batuka caro ba “ Jamba Anyuik “. Alah gulei dituka dari gulei paku/pisang mudo paranca lokan, panggang lauok masiek, gulei cubadak jadi gulei dagieng, cubadak,randang lokan, samba udang, gulei toco nan lamak-lamak. Makasuiknyo mak banyak urang datang nan akienyo tantu banyak pulo nan basalam ma agie kepieng. Jamba anyuik tu sabananyo barasal dari makan basamo sanak famili jo nan mangakok karajo, kiniko jadi jamuan undangan ka sado alanyo dan disikolah undangan nan banyaknyo, mak supayo banyak nan ditarimo pulo. Kini ko alah mulei di tuka jo ala Parancis yaitu di edangkan sabuah tampek sajo nan undangan lansuong ma ambieknyo. Sabananyo, jamba anyuik tu adolah baragie dan lansuong diantakan dan bukan diedang dan ambiek sandiri. Itu kurang ikhlas namonyo tu. Tapi dek maniti langkah karano moderen, di pelok ala Perancis tu, waloupun ado nan indak makan asakan banyak nan basalam baragie amplop.

4.BAPAKAT , adolah suatu caro untuok manantukan apo sajo karajo nan ka di kakok, paragat nan ka dicari dan baa rono alek ka di kacak. Itu mangkonyo bara pat tu atou mupakat sakoum namonyo yaitu pakat sanak,dosanak dan badosanak, sadangkan nan indak “ babaun daun kunik “ indak sato, supayo “ pungguong nan indak basaok tu “ indak nampak do dek karano alah ditumbok dek sakoum sa induok saparinduan “. Tapi kini alah tarang-tarangan mambari tahu “ pungguong ndak basaok tu “, dek maniti langkah karano moderen jo jalan mangundang rakyat banyak, waloupun indak “ babaun kunik babaun sarei “. Manga bak itu ? Supayo banyak dapek kepieng sumbangan nan diloncekkan kadalam ayan nan bakulilieng raun kadakek para undangan nan di imbou. Iko mailangkan tangguong jawab sa induok saparinduan, karano manuruik adat , sanak dan dosanak musti maminjek sasuei jo kasanggupan. Ado nan mambinjek sagoni bareh, sakian kabek kayu, sa goni karambie, sakian cubadak, sa ikuo kambieng atou sa ikuo batigo dan ado nan mancarikan paku, lokan, batiek, parancah atuo lainnyo, dan itulah tangguong jawan basanak jo badosanak. Tapi kininko bapangka ka kepieng sadonyo dan inyo nan ma atur. Ampieng sadonyo ba upahkan sainggo itulah mangkonyo undangan tu musti banyak, mak banyak pulo amplop nan ditarimo.

5.MANJALANG ,adolah untuok marapekkan pakaouman badosanak dan ma agie tahu kaduo balah pihak, sia koumnyo masieng-masieng mak supayo basitandoan. Si Marapuley tau sia mamak,mande,sanak ayah dan lainnyo, bak itu juo sabaliek nyo. Kini ampieng indak ado laid an manjalang di ari ghayo, alah batuka caronyo. Dolu kaluo manjalang ari ghayo, sanak dan anak-anak mambaok juada Ranah Nata sabagei paragie untuk Abang,Unieng,Mamak,Mande,Angku/Uci, Sanak Ayah/Umak. Tapi kini mambaok tu indak ado laid an nan dijalang musti ma masak supayo sanak pamili bias bakela sambie mamintak salam temple untuok anak cucu nan di jalang. Sifat baragie batuka ka mamintak jadinyo.

6.MA IMBOU ,untuok ma undang anak sudaro supayo datang pado acara hajat sa umpamo Baralek, Maimbou Malin, Syukuran, Tughun Karayie dll. Dolu, untuok ma imbou Baralek manugaskan Talangkey yaitu Mamak jo Mande sabagei wakie dari Ayah/Umak nan di paralekkan jo mambaok saparagat tampek sirieh ma imbou. Tapi kini dek alah ado Hp bisa sajo lewat Hp atou ma intei di Musajik, Lapou Kopi, Tapian mandi tampek manyasa, mak supayo entieng karajonyo. Kalou hanyo untuok baso basi dan malapehkan hutang sajo nanpaknyo, sadang kan inyo baharap supayo dapek sato dalam alek tu. Bak itu juo dalam ma imbou malin, biasonyo disampieng ma imbou juo diadokan “ manjapuik “.

7.BAKIBOT ,adolah marupokan acara wajib dalam satiok Baralek di Ranah Nata manggantikan Dikie Tamat Kaji. Bakibot bukan lanjuiktan dari acara Baralek, sabab dalam kamus Adat Istiadat indak ado acara kibot do, tapi badasarkan salero. Disiko tajadi bamacam ragam “ Ajang Rupo Tampilan Irama jo Suaro alias ARTIS “. Ado gaya cacieng ka angektan,anjieng batali-tali,batulak arun, basitonjak, basiampeh puleh jo bakalesong ba irama manumbuok,pabrik sa inggo ma ilangkan SI RANCAK ADAT salaku padoman ba seni budaya di Ranah Nata,

8.MILAD atau Harja atoupun Ultah yaitu mulei tapancanyo kito di dunieko. Sabana nyo acarako indak ado dalam Islam do. Itu ndak paralu diparingekti jo mamelok acara kacuali diri sandiri maingek dimano jatah hiduik makin bakurang dan batam bah dakek ka mati. Tapi ado pulo nan mamaelok acara khusus yaitu mamacahkan taluo ayam jo balau di ateh kapalo urang nan bamilad tu, lalu disiram jo ayie. Iko mancontoh dari lua Islam, tapi jadi acara wajib bagi sikolah Islam.
Untuok “ Maniti Langkah Karano Modern “, Sikolah Taman Kanak-kanak Aisyiah Busthanul Athfal (ABA), TK Nurul Hidayah dan TK Negeri Pembina tatap ma adokan acara ko ka rumah anak nan ba ulang tahun sa inggo si anak musti paid an mambaok kado nan acaranyo dipimpin dek Guru TK dimano si anak basikolah. Sabananyo indak jamaknyo TK Islam mangarajokan acara nan bukan dari Islam tu. Kadang, bagi nan kayo pakei kibot pulo nan mamakei biaya bak itu gadangnyo.

9.BA MIK yaitu mamakei sound system mak daerah tadanga suaro tu. Hampie sa tiok musajik jo surou mamelok pangareh suaro untuok mangumandangka bang (adzan) sadareh-darehnyo, waloupun di subalah atou jirannyo ado nan kurang sehat. Kalou untuok mangumandangkan bang jo suaro nan bapitunang cando buluoh parindu, itu sangat dianjuokan, tapi kabanyak cando suaro kambieng disumbalieh atou kurang bulan. Abih kamano nan rancak-rancak suaro tu ?. Kalou untuok sholat atou sumbayang, bo raso kurang pado tampeknyo dan mungkin tamasuok riya. Nan jangganyo, ado pulo sholat bamik jo Imam sorang artis badikie/badendang nan mamelok irama mambaco fathihah jo sikambang, mambaco ayat jo irama abi bakrin atou irama batarain, batahtim nan ma akibatkan indak tantu panjang pendeknyo dek karano si Imam padamoman ka irama lagu, bukan bapadoman ka ilmu tajwid. Mungkinkah irama fatihah ba sikambang, baco ayat jo sahu jao ???. Tantu indak kan !!! Mano mungkin sariosa dipelok tripping. Bismillaaaaaaaaaahirrahmaaaaaaaaaanirrahim, bisa ko ?? Ado pulo nan aneh dima no sorang Imam mambaco guntuong atou saparo. Takbir dibaconyo Allaaahu Ak , bangkik dari ruku’ dibaconyo Sami’allaaahu liman ( iko nan tadanga di ruik awak).

10.PAKAKEH DAPUO , dek manuruikkan Maniti Langkah Karano Moderen, jaman kini banyak juo barubah Pakakeh Dapuo, maloupun rasonyo kurang lamak badaceh. Papan lado jo batu lado alah batuka jo blender,teko batuka jo spenser, kukuran baganti jo masin,pariuok/balango,kampie nasi baganti jo majikom, kayu api baganti jo miak tanah,papik baganti jo kulkas dan lain sabageinyo. Baa kato gulei nan ka padeh, nan padeh tu bana indak pacah do (bijo lado). Bak itu juo lauok ,indak manih basagu rasonyo lei dek alah dipapik kulkas tu. Apolei maso kini ko listrik nan indak bakatantuan dan kalou iduikpun arusnyo acok randah. Baun kantuik balapieh nasi nan di majikom tu.
Ikolah babarapo bantuok kacak nan alah maniti langkah karano moderen ( Malakamo) nan alah bajalan dan alah mambudayo di Ranah Nata, kironyo dapek kito pelok’i nan sabananyo, supayo kito jangan masuok ka pabauektan nan sio-sio dan bukan dari Ugamo nan kito nauik. Smoga !!!.