Laman

Senin, 14 Maret 2011

" NUN TA " NATA


MA OTA di LAPO KOPI

“ NUN TA “
Asuhan : Mamak Malako

Konsi “ MULTATULI “ nan tadiri dari Mamak,Aciek,Lantam,Anduok,Kinca dan Ojok sadang ba bincang – bincang masalah NAMO. Anduok mamulei tanyo dakek Mamak nan sadang mamakan “ Kotan “ jo “ Kopi Balantak “. Anduok batanyo …

Anduok Mamak ? Ado tadanga di ambo basonyo namo ranah kito ko ado nan mangecekkan NATA , Natar dan ado Natal, tautamo Pamarentah.
Lantam Anduoklah diang Buyuong, Apo lei !
Kinca Lantam bana waang deh ! Sasuei jo namo waang tu. Urang batanyo mak sato kito tau.
Ojok Iyo bana. Baru mulei batanyo waang alah manginca pulo. Kinca lah …
Mamak Alah … alah,alah tu !! Rusak konsi dinyo ko beko. Masalah NAMO, kok kalian masih bisa di baco didalam pesbuk,waloupun itu cuma gala. Anduok nan ma ansuoh, Lantam nan mambantei, Kinca nan mangacou dan Ojok nan manjarulakkan urang ajo.
Anduok Jadi…, nan bo tanyo cako, Mak ?
Mamak Nanti dolu . waang bagageh ajo nandak ma anduok. Nan parahnyo tau kalian ? Di dalam pesbuk banyak namo nan mirip namo urang Barat, Japang dan ado pulo nan payah mambaconyo. Bapelok pulo gambarnyo binatang. Kok malu manunjuokkan namo jo rupo, manga sato awak ba pesbuk tu.
Aciek Tapi ma ikuik jaman Da ! kato padusi Mamak. Kito ko nan ka jadi Kabupaten PANTAI BARAT, jadi tapaso di ansuo-ansuo caro Barat tu waloupun di musim Barat bana.
Ojok Tapi moderen manonyo Etek ! Caliek lah talingo ambo ko,Tek ! Alah batindiek ba karabu kan?
Aciek Iyo..!!! Urang TAPASUOK namonyo tu. Awak jantan rupo batino. Calieklah di Uda kini. Baralek, kok indak BAKIBOT indak sah Baralek tu do.
Mamak Bakibot tu indak Baralek namonyo tudo, Itu alah dilua garis ADAT namonyo tu. Nan Baralek tu, Badikie,Ba Arak Haji,Arak Pasumandan,Badendang,Arak Inei,Basandieng Duo,Ba Tamat Kaji dan Arak Tamat Kaji dan lainnyo.
Aciek Kini Da mamikiekan mano nan entieng,asa Bakibot,karano bakibot tu alah wajib dalam Baralek.
Mamak Jangan….! Jangan campuoh bauoh kan acaro Adat jo caro Barat !! dak bulieh tu do.
Kinca Bakibot tu Tek datang sumangek awak. Lagunyo langgam manumbuok,goyangnyo bak cacieng gilo kapanesan.
Aciek Nan gilonyo ado pulo “ GOYANG ANJIENG BATALI-TALI ANTARO LAKI-LAKI JO ARTIS PADUSI “. Indak “ TAPASUOK “ namonyo tu ???
Lantam Indak baitu di Mak. Tanyo si Anduok cakolah. Mak tau kami-kami ko.
Mamak Jadi ! namo ranah kito asalinyo adolah “ RANAH NATA “ nan barasal dari baso Arab. RANAH artinyo rauong,pakiek,rengek ataou jeritan baso Polisinyo. NATA artinyo gunduokkan tanah atuo BUKIK yaitu BUKIK BANDERA,LANSANO,KAYU BATU, BATU KURISI,BANJARAGAM jo SIMUNGKUOK. Jadi, “ RANAH NATA “ artinyo “ RAUONG DARI ATEH BUKIK “. Asanyo, pado wakatu itu ado urang nan basalah di ukum di ateh BUKIK BANDERA nan kabatulan IBNU BATHUTHAH dari Arab singgah mancari rampah – rampah di ranah kito ko. Mandangan kajadian tu, mako Ibnu Bathuthah manamokan ranah ko “ RANAH NATA “. Sajak itu ranah kito ko banamo “ RANAH NATA “.
Anduok Jadi, manga di kecekkan NATAL , Mak ???
Mamak Sakitar tahun 1492-1498, masuok urang Sipatokah ka RANAH NATA ko mancari rampah – rampah. Dek karano pamandangannyo samo jo Natal dan ado di Aprika Salatan jo Amerika Salatan, lalu dikecekkan urang tu RANAH NATA ko banamo NATAL. Sadangkan urang Ulando mangecekkan NATAR.
Anduok Natar tu apo pulo tu, Mak ?
Mamak Natar tu artinyo tanah data atou paladangan. Dek karano di Ranah Nata banyak rampah – rampah, lalu dikatokan urang tu Natar. Tapi.., lain pulo carito dari Mandaelieng.
Kinca Baa pulo curitonyo tu, Mak ??
Mamak Wakatu Mangaraj Uhum dari Mandaelieng pindah ka Ranah Nata, urang tu singgah di Tor Pangolat. Dicaliek urang tu ado pamandangan nan rancak, lalu urang tu batanyo “ Aha Natarida ‘i ? “. Dalam baso Mandailing, Natar tu adolah “ Nan Rancak “. Jadi, sampei urang tu ka Ranah Nata, lalu kecek urang tu “ On ma Nataridai ‘. Natarida manjadi Natar.
Ojok Mangaraja Uhum tu, sia tu, Mak ?
Mamak Mangaraja Uhum tu, angkunyo dek Puti Junjuong Nai Mangatas, padusi Sutan Muhammad Nata. Inyo tibo taun 1710 di Ranah Nata ko.
Anduok Jadi, baa kasimpulan Mamak ?
Mamak Bialah apo pun disabuik urang tu, nan jaleh ranah kito ko RANAH NATA. Cubolah kalian caliek di tapi lauik tu, ado tando-tando namo NATA tu.
Lantam Tando-tando baa tu, Mak ?
Aciek Ado –ado ajo di mamak kalian ko na !.
Mamak Iyo ! Tando nan dibarikan Allah Ta’ala dakel kito kasado alae. Cubo caliek di tapi lauik atou pasie sabalah Utaro nin. Dari Ujuong Karambie Tenggi sampei ka Ujuong Rakat itu adolah hufuf NUN. Titieknyo, itulah Pulou Unggeh. Dari Ujung Rakat ka Ujuong Tuan itulah huruf TA nan titieknyo Pulou Tamang jo Pulou Rubiah. Jadi NUN TA yaitu NATA.
Aciek Tapek bana tu Da !. Jaleh jadinyo kan ?
Kinca Fakta nan factual kato moderennyo tu, Tek.
Mamak Jadi alah tu kan ! Urang alah bang di Musajik, mamak nandak ka Musajik nyo lai.
Anduok Iyo, Mak. Kamipun parmisi nyo lai. Assalamu ‘alaikum..
Mamak Alaikum salam ….
Urangtu pun turun dari Lapou Kopi “ MALAKO “ masieng-masieng manuju rumahnyo.

Tidak ada komentar:

Posting Komentar